Historia de Corea del Norte

La hestoria de Corea del Norte empieza cola ocupación xaponesa de Corea, que terminó col fin de la Segunda Guerra Mundial en 1945. Corea foi entós estremada en dos partes pol paralelu 38: la Unión de Repúbliques Socialistes Soviétiques (URSS) tomó'l control de la parte norte, y l'exércitu de los Estaos Xuníos de la parte sur. Esto condució a qu'en 1948 estableciérense dos gobiernos independientes nel Norte y nel Sur, cada unu reclamando la so soberanía sobre la totalidá de Corea.

Les crecientes tensiones ente los gobiernos del Norte y del Sur desaguaron na Guerra de Corea cuando'l 25 de xunu de 1950 l'exércitu de Corea del Norte crució'l paralelu 38 (qu'actuaba de frontera) y atacó. La guerra siguió hasta'l 27 de xunetu de 1953, cuando'l Comité de la Organización de les Naciones Xuníes (ONX), los voluntarios de la República Popular China y Corea del Norte roblaron l'armisticiu de la Guerra de Corea. Una zona desmilitarizada foi establecida pa dixebrar a los dos países.

Corea del Norte foi dirixida dende 1948 por Kim Il-sung hasta la so muerte'l 8 de xunetu de 1994. Dempués, el 8 d'ochobre de 1997, el so fíu Kim Jong-il foi nomáu Secretariu Xeneral del Partíu del Trabayu de Corea. En 1998, foi nomáu Presidente de la Comisión Nacional de Defensa y la so posición foi declarada como "el cargu más altu del Estáu". Xeneralmente les rellaciones internacionales ameyoraron. Inclusive hubo un cume Norte-Sur histórica en xunu de 2000. Sicasí, les tensiones volvieron faer se visibles cola continuación per parte de Corea del Norte del so programa d'armes nucleares.

Mientres el mandatu de Kim Jong-il a finales de la década de los años 1990, la economía del país baxó considerablemente y l'escasez de comida fíxose evidente en numberoses árees. Según delles organizaciones d'ayuda, un desconocíu pero gran númberu de persones morrieron de resultes de la fame, intensificada por un colapsu nel sistema de distribución de comida. Numberosos norcoreanos enfusaron illegalmente en China en busca d'alimentos. Corea del Norte ye unu de los sitios más aisllaos del mundu, con severes restricciones na entrada o salida del país. La prensa ye controlada pol Estáu y organizaciones de mases, y l'ideoloxía Juche, que consiste en nun depender de los demás, ye la oficial del gobiernu.

Nos últimos años, el so programa nuclear desamarró discutiniu ente los estaos nucleares, particularmente Estaos Xuníos, polos oxetivos del so desenvolvimientu militar. Ente que el gobiernu norcoreanu argumenta que'l desenvolvimientu d'armamentu nuclear tien una finalidá disuasiva y d'eventual defensa, l'alministración estauxunidense y la Xunión Europea consideren illegal la tenencia de material bélico atómicu per parte de Corea del Norte.